er húsgagnasmíðameistari og trétæknir að mennt með víðtæka starfsreynslu á sviði ráðgjafar, kennslu tengdri trétækni og stjórnun.
Hann var í námi  hjá Erik Borsholt cand. silv. við Dansk Teknologisk Institut að læra rekstur og eftirlit með gagnvörn. Hann setti upp fyrsta gagnvarnartankinn á Íslandi hjá fyrirtækinu Völundi árið 1971 og sá um rekstur hans sem framleiðslustjóri þar í fjögur ár.

Hann var deildarstjóri Trétæknideildar Iðntæknistofnunar Íslands og síðar Rannsóknastofnunar byggingariðnaðarins þar til deildin var lögð niður. Hann var þá í samvinnu við aðra um eftirlit með gagnvarnartækjum sem þá voru starfandi á Íslandi. Einnig sá hann um eftirlit á fyrirtækjum í Lettlandi og Eistlandi sem voru að selja gagnvarið efni til Íslands.

Var um árabil fulltrúi Íslands um timburmálefni í norrænu samstarfi hjá Iðnþróunarsjóði Norðurlanda, Nordisk industrifond, sem nefnt var Nordic Wood og einnig starfaði sem framkvæmdastjóri norræns límtréseftirlits í nokkur ár.

Hefur sérhæft sig í flokkun á timbri í samvinnu við fyrrum Rannsóknastofnun byggingariðnaðarins, nú Nýsköpunarmiðstöð Íslands sem sér um að votta fyrirtæki í flokkun á timbri og haldið námskeið þar um bæði á Íslandi sem og erlendis t.d. í Lettlandi á vegum BYKO hf., í Eistlandi á vegum Húsasmiðjunnar hf. og í Litháen fyrir Quercus.

Hefur unnið sem verkefnisstjóri í verkefninu Vinnsla og grisjun í samvinnu BYKO hf og Skógræktar ríkisins með umsjón Námsgagnastofnunar og styrk frá Nýsköpunarsjóði atvinnulífsins.

Einnig hefur hann verið aðalhöfundur ritsins Rétt notkun á timbri sem Rannsóknastofnun byggingariðnaðarins, BYKO hf og Húsasmiðjan hf gáfu út í sameiningu 1991 og aftur 2002 ásamt því að hafa ritað fjölmörg svokölluð Rb-blöð um timbur sem Rannsóknastofnun byggingariðnaðarins gaf út.

Hann vann að útgáfu Norræns timburorðasafns, sá um íslenska hlutann og er sá nú  í  Íðorðasafni hjá Stofnun Árna Magnússonar í íslenskum fræðum. 

Eiríkur stofnaði Trétækniráðgjöfina árið 1998 og hefur hún verið hans atvinna eftir að hann komst á eftirlaunaaldur árið 2019 og hætti hjá Nýsköpunarmiðstöð Íslands en þar var hann gæðastjóri og umsjónarmaður með fasteignum.

Stærsta verkefni Eiríks í TreProX samstarfsverkefninu var að þýða handbókina Handelssortering av trävaror úr sænsku og heitir hún Gæðafjalir – Viðskiptaflokkun á timbri úr barrtrjám og kom út í nóvember 2020 á vegum Landbúnaðarháskólans í Erasmus+ verkefninu TreProX. 

Nýjasta stóra verkefni Eiríks er gerð námsgagna og kennslumyndbands í samstarfi við Iðuna fræðslusetur um flokkun á timbri út frá bókinni Gæðafjalir og staðlinum ÍST-INSTA 142. Reiknað er með að kennslan hefjist fljótlega á árinu 2024.